四季椰林海南椰子雞 (MOKO新世紀廣場)

同老人家去打邊爐，記得之前返大陸佢食過椰子雞，好鮮甜又滋補，所以今日同佢過嚟新世紀再食椰子雞。呢間四季椰林椰子雞係用4個椰子一鍋湯, 一滴水都唔會加入湯底。個湯底係百分之百椰子水，煲滾咗之後先飲一碗，好鮮甜，我哋叫咗個二人餐一齊食先有半隻雞，雞隻係用上海南文昌雞，食落去係嫩滑有雞味，一定要食埋啲皮，覺得最好味嗰部份就係充滿雞油香味嘅雞皮。

二人餐有一碟貴州紅托竹笙，係連埋雞一齊放落個鍋嗰度煮，吸晒椰子嘅鮮甜同埋雞油香味，爽口多汁。

三秒響鈴真係唔好淥多過3秒，夾上嚟軟硬適中，豆香味濃郁！

潮汕魚蛋同埋牛丸比我想像中出色，牛丸係爆汁彈牙，夾上嚟記得攤一陣先食，咬落去小心啲肉汁彈到對面。魚蛋爽口易𡁻，不錯。

最後送上嘅煲仔臘味飯，超大一鍋，加上芫荽同埋豉油撈埋一齊食，飯焦香味撲鼻，不知不覺食咗兩碗，食完呢個二人餐簡直飽到上心口。