花園餐廳 (綠楊坊) (已結業)

午市套餐有鐵板，都好耐無食過港式鋸扒。有紅/白餐湯、牛油+餐包、餐飲，免加一服務費。紅湯羅宋湯多蔬菜，又有少少牛肉粒，酸度合適，味道不錯。之前見人講無餐包，改咗梳打餅，但員工又送上牛油+餐包，雖然都係用微波爐十秒番熱。鐵板肉眼牛扒（$85）鐵板西冷牛扒（$85）要求五成熟，上枱淋汁（蒜蓉汁或黑椒汁，揀咗前者），太耐未食過即場淋汁，差啲唔記得用餐紙擋住。睇住員工淋汁，鐵板即刻"滋滋啫啫"，久違嘅新鮮感。牛扒都有一定厚度，切開中間仍見鮮紅，五成熟PASS，煎扒時間控制不錯。肉眼牛扒：肥膏位合理，肉質軟腍，肉味就唔多。西冷牛扒：側邊筋位唔韌，有𡁻口，肉質同樣軟腍，但較肉眼紮實少少，肉味亦比肉眼多少少。係粗身波浪薯條，外脆內粉。另外仲有些少西蘭花同蕃茄。