茶餐A (已結業)

點菜時，見到餐牌版面有咖哩牛腩，想起一件有趣的事。年前遇到一位新認識的日本朋友，被問及那處可吃港式咖哩，即時抓頭！日式、印度、巴基斯坦就有，香港那有本土咖哩，追問佢係邊處吃過，以為他到了那些名店或酒店餐廳，最後真搞笑，原來他去了家連鎖快餐店！港式咖哩，就是我們在茶餐室吃到的，唔辣但味道濃郁，醬油豐富，當然喇，要送大碟飯，唔係點夠飽！今晚就點了咖哩牛腩飯，有香味，飯菜份量無偷工，泥黃色的咖哩，薯仔牛腩份量一半半，咖哩汁濃郁，黏稠在每粒米飯上，發現有用八角煑，仲唔係港式！牛腩有筋半肥瘦，容易咬腍軟，成碟飯掃清，唔怪得，日本人都愛我們啲咖哩。以茶餐室計，光猛清潔齊整，刀叉紙巾放在餐桌櫃筒，抹枱快手，斯文版，無粗聲粗氣對客人。飽肚滿意，路過唔介意再試。