甜入心 (已結業)

呢排成日打風，搞到空氣污染指數極高又焗，成日抖唔到氣，出街行一陣已經好辛苦。咁啱今日去開深水埗電腦中心買野，行行下突然想食啲透心涼嘅甜品清涼一下，於是諗起我最愛嘅椰皇子，即刻同老公去清涼消暑一下。遠遠已經見到粉紅色的招牌正向我招手一樣，色彩繽紛。而且餐廳牆壁圖案色彩奪目，令人有種好開心嘅感覺。而且餐廳仲有提供免費嘅淡果茶供食客消消暑。淡果茶味道雖然偏淡，但透心涼又消暑解渴。坐低不久就見到我最愛嘅椰皇甜品剛剛做起，我當然二話不說立即叫返一個清涼一下。出浴椰皇子名字趣怪，原來係原個椰皇子取肉整成，新鮮椰皇水加椰子肉製成啫喱質地的果凍，面頭放上焦糖布丁，椰皇子味道清涼透心，椰味濃郁，焦糖布丁又滑又甜美。龍顏大怒有龍眼，西米，Q珠，椰皇啫喱，雲尼拿雪糕+椰汁，味道好豐富，西米又有咬口，椰皇啫喱又清甜加上冰凍椰汁，超吸消暑。