坤記煲仔小菜

营业中

休息中

我哋九點半左右到，入面坐滿人，出面就開左4張枱，仲有2張未開。不過店員一開始唔肯開張枱俾我地。我哋要等再派個靚女問咗幾次問埋老闆先肯開一張枱係出邊，等左10分鐘算係咁。本土香港服務係咁上下。我哋叫咗嘅小菜好快就到。叫咗椒鹽鮮魷，生炒骨和菜心炒牛肉。小菜係一般貨色，但唔係貴，都可以接受。肚餓唔通唔食咩。另外叫咗兩個煲仔飯一個係鹹魚滑雞飯，另一個係臘味排骨飯。煲仔飯等了太耐，等左50分鐘先有第一個煲仔飯，另一個煲仔飯再要等多10分鐘，真係慢工出細貨。煲仔飯的飯焦係好食嘅，飯焦夠脆又唔會太燶食唔到，而佢個飯就比較濕，仲有就係好多餸！鹹魚滑雞，我鐘意舊鹹魚，好正！臘味嘅味道唔錯，我比較喜歡潤腸同臘肉，臘腸就一般啊。如果唔使等位，不妨來食下煲仔飯。如果我下次再來，一定係為飯焦而來！