發哥粥底海鮮火鍋 (已結業)

今日同老公去左九龍灣行街，聽朋友仔講工廠區個邊有多d野食揀，唔駛去連鎖店食，可以支持下d小店。過左德福戲院，去到工廠區，收到宣傳單張，有間火鍋店做緊優惠，每人減20蚊，一於去試下。我同老公揀左龍蝦海鮮火鍋，食海鮮最緊要就係要夠新鮮， 發哥好值得推薦嘅地方就係佢啲海鮮真係好新鮮 ，貴妃蚌同聖子都不得了，好甜好爽口；蝦雖然唔大隻，但係好有蝦味，而且好新鮮彈牙； 龍蝦都算大隻，啖啖肉，又爽口； 多寶魚好滑。 食完海鮮真係好滿意 ，跟住食手切肥牛，牛味好香。跟住仲有八樣配料可以揀，但係由於己經飽飽地，只揀左幾樣，當中必食 有美國肥牛、鮮炸魚皮同埋鮮炸響鈴 。美國肥牛，唔係平價貨，有牛味；鮮炸魚皮食得出真係新鮮炸出黎，粉夠薄，好香脆；響鈴吸收晒湯底海鮮嘅精華，好鬼正，最後可以煮個粥食埋海鮮嘅精華，但由於太飽嘅關係，冇食到。ps. 記得要嗌餐廳嘅自製嘅 竹蔗茅根水，好清，唔會好甜，好正，兩個人飲左成4 Jar。埋單500幾，唔使加一，d野又咁好食，真係 好抵，見到有6送1，下次約埋幾個朋友一齊黎。