伙伙餐廳 (已結業)

呢間位於灣仔同銅鑼灣中間嘅餐廳，專門打做葡國菜，今日專程嚟試試。一眼望埋去個Menu，最吸引人一定係個招牌海鮮拼盤$488，所以叫左個。另外叫多左兩個主菜：非洲雞 $138同紅酒燴牛尾$178再叫埋個兒時回憶火焰雪山，應該都幾完滿。先嚟個海鮮拼盤，估唔到佢二人份都幾大份，裡面包括龍蝦一大隻，兩隻掌心大鮑魚，蟹一隻，蝦貝類數隻，最精采係啲象拔蚌仔，細細隻好鮮味。全部海鮮都幾新鮮。但最重要係佢哋既服務，今時今日係香港食嘢都無咩服務要求。但呢間餐廳出奇地好服務，換碟換得好密，而且每道菜一道一道上，唔會一次過一兩碟一齊出搞到啲嘢凍晒。第二道係燴牛尾，牛尾炆得夠軟身又入味。非洲雞最讚唔係隻雞，係啲外皮炸得好脆嘅薯條。最後終於到我最期待嘅火燒雪山儀式，但最神奇係裡面有三球雪糕，仲有個幾好味嘅蛋糕底。呢餐真係非常滿足。