S2 鐵板燒 (已結業)

今晚帶媽媽食呢間日本鐵板燒餐廳，對於我地嚟講好新奇啊，第一次可以見到師傅喺我地面前親自煮嘢食比我地。而呢間S2餐板燒好近佐敦地鐵站，一到出口基本上向右直行嚟到了。店員話有個新套餐：海膽杯盛宴（$1888)，雖然都幾貴下，但媽媽話想食喎，好啦！做下孝順女先～一開波先有個沙律杯波同刺身做頭盤：北寄貝、赤蝦、三文魚。之後就已經係佢signature嘅海膽杯：海帶碎、海膽、三文魚、帶子、拖羅、海膽、白飯魚乾。雖然細細杯，但見佢咁多層真係好有誠意啊。之後呢個海膽杯係由蟹殼裝住，上面蟹膏、蟹肉、魚籽、海葡萄、鱒魚子、洋蔥，味道除咗有濃濃嘅蟹香，就偏鹹了一點，餸下飯就好啦。海膽焗原條海參，媽媽好喜歡呢道菜啊，海膽焗到脆脆地，唔算好淋，到海膽嘅味道都幾夾。海膽流沙大蝦多士，每人一隻沾上流沙海膽嘅大蝦，下面嘅多士烤到好薄好脆。然後就到燒龍蝦啦，燒到著哂火！隻龍蝦好大！芝士超拉絲，我地兩個人食都食唔哂。呢個重頭戲不得了啦！總括而言，呢個盛宴真係超級豐富！食到我同媽媽超級飽又滿足！