漁獲浜燒 (已結業)

今日同朋友去銅鑼灣食飯，行到sogo隔離嘅逸園中心見到好多食肆都好想試，朋友鐘意食日本菜，最後去左18樓嘅魚獲浜燒食。坐低咗睇menu，問下侍應有咩推介，最後點咗刺身，幾樣燒海鮮，清酒煮黃金貝同和牛石鍋飯，同叫咗枝Sake。等咗一陣刺身就到，我地點金目鯛刺身，魚肉爽口身鮮，配埋酸汁，帶返出魚嘅味道，好好味！食晒刺身侍應會將原本作為裝飾嘅魚骨同魚頭拎去炸，又變咗另一道菜，炸香咗嘅魚骨好香脆，當佐酒小食一流。食完刺身，侍應就開始燒切好嘅海鮮，我地點咗鱈場蟹腳，鮑魚，日本北寄貝同日本響螺浜燒，睇住侍應一邊燒一邊食好有風味，鮑魚燒得啱啱好唔會韌，鱈場蟹腳啖啖肉，燒香咗食落好惹味，響螺同北寄貝會用清酒同木魚湯煮熟，清酒嘅味道令鮮味更加出，加上材料新鮮，提升咗味覺嘅享受同味道。清酒煮黃金貝，大大隻好鮮甜，喺面前煮熟，視覺同味覺雙重享受。最後上嘅喺和牛石鍋飯，用生嘅和牛加其他材料，上枱後由侍應攪拌，牛肉唔會overcook，入口彈牙，配埋飯食，口感好有層次，味道亦都一流。最後點埋甜品柚子雪芭，香濃柚子味為呢餐劃上圓美嘅句號。呢餐食得好滿足，值得一試再試！