泰屋

营业中

休息中

朋友生日想約食飯，喺香港星期五要喺旺區食個晚餐有時真係覺得貼錢買難受。唔係坐得好鬼迫就係有限時，坐都坐得唔舒服。呢一間介乎於旺角同埋太子嘅上樓鋪之前都食過幾次，唔限時唔趕人味道又唔錯，而且仲要有得訂位。3個女仔其實食量唔算大，不過都叫到成枱都係餸！青咖哩雞、泰式魚餅、大蝦柚子沙律、馬拉盞炒通菜同埋烤餅。青咖哩雞一心就諗住配烤餅，佢有薄餅同烤餅，烤餅乾身d無咁油所以我地揀左烤餅。泰式魚餅已經切好左一半，方便大家夾嚟食，好有泰國香料味，唔錯。柚子大蝦沙律賣相幾靚，連埋個柚子殼一齊上枱，令我諗起菠蘿炒飯，有異曲同工之妙，而且面頭幾隻大蝦都算大。馬拉盞炒通菜無咩特別，只係唔想啖啖肉想食番多d菜所以先嗌，人大左點都要注重下健康嘅！烤餅好鬆軟，用嚟配咖哩索埋d汁一齊食真係一流。價錢唔貴味道又唔差又唔限時，係旺區嘅食肆嚟計真係好少見，食野中間仲有人主動斟水唔駛左叫右叫，服務態度亦都唔錯，夠主動，一定有下次。