倪姐泰國美食 (已結業)

小弟作為熟悉九龍城一帶，一定要帶朋友們突破框框，帶佢地去一間我食開又唔錯嘅泰國菜館倪姐泰國美食！頭盤唔駛多講，必食生蝦刺身，刺身都算新鮮，生蝦大大隻，入口仲感覺到好爽口。生菜包可以選擇豬／牛／雞，我們選了豬。豬肉非常足料呀，我每次食都包咗好多好多豬肉，食得好滿足，食到尾菜用晒都有豬肉剩，唔洗食到就住就住，好滿意！呢個炒金邊粉嘅造型好可愛，有一個蛋網包住，同波羅包好似樣。蛋絲令金邊粉更滑，而金邊粉亦好爽口，加埋旁邊肉碎粒粒，唔錯。串燒雞全翼大大隻兼啖啖肉，同配上的沙嗲醬好夾，好惹味。成餐飯既重點及最出色就係烤羊架，雖然賣相比較黑，唔太討好，但食落肉質鮮嫩。調味方便，無騷味之餘，又唔會太燶及太鹹，剛剛好，而最好係又有沙律伴碟，方便食完減膩。炸芝士波一碟就有五件，全部都好香口。起初食落食極都唔見有芝士，以為漏左加，原來係芝士唔平均，側埋一邊，不過整體都好脆口，不過甘邪惡食完就覺得有d氣熱。整體食物都唔錯，都好惹味，而坐左好耐傾計又唔會特別趕走，下次可以再來。