泰一 (已結業)

前排聖誕節假期，行過香港仔中心，發現之前內部裝修的”泰一”又開番。老實說，之前食過，感覺真係一般。但見門面裝修得幾有聖誕氣氛，所以決定入去試多次。坐底左細心睇下個餐牌，發覺好多之前貼左label(暫停供應)的菜式都賣番哂，咁就真係多番好多選擇 ！上菜速度ok (比未裝修之前有效率)，先上的是雜錦拼盤，100蚊都唔駛的價錢食咁多款泰式小食，心諗唔難食都收貨架la，點知真係有驚喜，特別是串燒，比之前改良左好多，之前食呢度的串燒，感覺「乾憎憎」，但今次食除了有那種外脆內軟的感覺外，咬落去仲有肉汁，不錯!另外，每次食泰國菜都「必叫」馬拉盞炒通菜。之前食過覺得佢地炒出來的味道唔夠，汁又淡，完全唔惹味。今次再試發覺完全兩回事，起碼通菜比之前炒得乾身，咬落去亦覺惹味，但我覺得廚師好似除了用馬拉盞來炒外，亦加左蝦醬落去，不過無咩所謂，味道我覺得ok。另外，叫了菠蘿炒飯、冬蔭功湯等大路菜式，質素都好穩陣，埋單走人，盛惠二百蚊鬆d，尚算抵食。不過呢餐飯令我疑問係同一間餐廳，同一款菜式，但裝修後的味道卻不一樣(改良左唔少)，我好懷疑佢地轉左班廚房。