喜鍋 海鮮‧火鍋‧小廚 (已結業)

一班人去油尖旺食飯，又有牛魔王在陣，腦海中立即浮現三層牛魔王塔！二話不說，梗係直去喜鍋啦！上次食坐咗上二樓，有少少唔太自在，今次坐樓下感覺更好！番茄湯再加豉油麻醬不在話下，驚喜嘅牛牛塔又有進步！今次嘅牛牛質素比上次更好，尤其係中層安格斯肥牛直情係入口即溶，牛味又好夠，形容為滿咀肉香都不為過！牛粒我本來係麻麻哋喜歡，不過今次都食咗好幾粒，因為唔韌好爽口，我最驚咬到牙較都痛，不過呢隻牛粒完全無呢個問題！本地牛牛都出色，脂香四溢。連牛魔朋友仔都讚不絕口，今次去啱地方啦！值得一提係啲餃，水準一樣咁好！尤其韭菜好香口好味，皮都夠薄，記得叫！