Green Orange

呢晚出咗去上环做嘢，之后顺便约喺附近返工嘅朋友仔食饭，记得之前食过唔错，所以决定再帮衬! 睇紧餐牌嘅时候，店员主动介绍同推介一啲食品，我哋听完都觉得唔错，所以就落咗单。然后就嚟咗热热嘅餐饱，食落微甜松软，有淡淡麦香，点埋橄榄油同黑醋，又系另一种滋味。首先上菜嘅系烧带子柚子沙律，带子表面煎得香口，里面肉质鲜嫩，火侯控制得好好，柚子又甜又多汁，带微酸，再配埋沙律菜，好清新嘅感觉! 再来就系蟹肉南瓜忌廉汤，南瓜味香甜，质地好幼滑，啖啖蟹肉搅埋啲浓汤，真系好夹好好饮! 之后就上香煎鹅肝伴黑松露意大利饭，鹅肝充满油香，煎得好香脆，配埋有黑松露香嘅 creamy 意大利饭，虽然邪恶，但食咗先至算，好正呀! 另一个主菜叫咗酱烧美国猪仔骨，店员介绍佢哋用嘅系比较多肉𠮶款猪仔骨，切开一睇，真系唔同出面食到𠮶啲，真系好厚肉，啲肉食落又淋又滑，有肉味，唔错! 食完正餐，就到甜品时间，叫咗个朱古力布朗尼伴云呢拿雪糕，布朗尼最怕焗到干争争，呢到食到嘅仲保持到湿软嘅感觉，朱古力味香浓，配埋冰冻嘅云呢拿雪糕，一冷一热，为呢餐画上完美句号。