正宗水上人氣鍋專門店 (已結業)

經過砵蘭街就比依間店舖吸引住，見到張張枱都有頂越南草帽，好打意喎，睇真啲原來係蒸氣鍋。蒸氣鍋 - 響香港真係第一次見依種草帽蒸氣鍋，通常見都係鏽鋼蒸鍋，比人有種冷冰冰既感覺，依度就真係溫暖好多。黃金汁蟶子皇 - 叫得蟶子皇，當然size 都有返咁上下啦，不過上面個醬就食唔出有啲咩，但食落新鮮爽口就一定無得輸啦。黑松露醬蒸大元貝 - 黑松露味濃原來配清清地無咩味既海鮮原來都唔錯喎。而佢地黑松露既份量都控制得幾好，如果太多就會蓋過帶子原有既鮮味。手打四寶丸 - 四寶丸有牛丸、墨魚丸、蝦丸同豬肉丸，佢地既蒸肉丸比較濕，唔似得有時食山竹牛肉咁，會感得太乾，可能會係即蒸即食既原固，入口彈牙好食，唯一要彈既係份量，每款得3粒，如果有4粒，我會覺比較滿足。金蒜糯米蒸花蟹 - 當然依個係重點所在啦，就小第所見真係枱枱都有叫，相信大家都預期好好食，當然無錯啦，軟綿綿又煙韌既糯米飯吸晒蟹入面的精華，又點會唔好食喎。不過呢如果上面果隻唔係花蟹，而係水蟹我一定會再加分。