富臨皇宮

营业中

休息中

石門早幾個月開左三間酒樓，當時試過三間，最驚喜係竟然覺得富臨最好食。今次再同媽咪去，食物品質差左好多，下次食返另外兩間。呢個燒鵝瀨粉幾好味，燒鵝唔會燒到好老，食落好香，個鵝皮唔會好硬算係幾好味。瀨粉就硬左少少，個菜好嫩好新鮮。咸水角望落都算脹卜卜，以為係熱嘅，不過食落原來係凍嘅，個皮仲要炸到好油。蝦餃反而唔錯，唔稱得上為皮薄餡靚，但蝦嘅份量都幾多，都幾新鮮幾爽口。個皮就冇乜特別正正常常，不過勝在放左陣都仲熱辣辣。呢個鹹菜豬肚今次真係麻麻，豬肚有少少霉霉地，食落個口感就係唔好，佢未至於變壞，但係應該就快變壞囉。個湯太咸，除咗鹹味飲唔到其他味。上次食係好好味，豬肚好新鮮好有口感，個湯除咗鹹味仲有好香嘅胡椒味。最後以芒果糯米卷作結，一邊個芒果布丁太甜，冇乜芒果味，個皮略嫌太薄，厚返少少會好味啲。