陳儀興尚潮樓 (太子道西)

营业中

休息中

潮州打冷相信好多人都食過，今次朋友就就帶我去一間位於太子嘅高級嘅潮州餐廳。一入門口陳儀興尚潮樓已經俾到一種乾淨，舒適嘅感覺我，有別於一般潮州打冷店，唔會覺得擠擁同嘈吵。不論菜單，桌椅同餐具，都別具傳統中國特色。生醃瀨尿蝦（$144）瀨尿蝦食得多，生食嘅就真係第一次。開頭都有啲抗拒，但食落就真係停唔到口。瀨尿蝦好新鮮，蝦殼基本上唔使剝，一節節放入口，然後大大力吸佢出嚟。食落有少少酸辣，肉質好厚好滑，一食真係停唔到口。鵝三寶（$228）三寶指嘅係鵝肉，鵝肝同鵝腸。份量都幾多，四個人食都好夠。鵝肝好新鮮，有別於法式鵝肝，食落暖暖地，唔會太韌或者太軟，一般鵝肝食幾塊就會膩，但今次反而愈食愈多。鵝肉都好滑，食落唔會老，加埋啲白醋，酸酸地好開胃。最後鵝腸就好爽口有彈性，食落索索聲。老藥桔（$20）開頭見到個藥字以為會好苦，點知飲落好甘甜，帶少少酸，味道好特別。服務員話喉嚨唔舒服就最岩飲。