大澳德發 (已結業)

約咗朋友一起吃晚飯，由於最近大家都好忙，所以完全無心思諗去邊度食，只是將見面地點暫定喺銅鑼灣。好彩今日大家都可以準時收工，隨意在街上走走，竟發現位於北角的「大澳德發」喺謝斐道開咗間新分店，有人表示有興趣，我當然沒有異議。餐廳主打水上人家菜，食物選擇好豐富，有大澳招牌菜、海鮮、龍躉菜式、魚鮮類、蒸餸、豬牛雞類、蔬菜類、炒粉麵飯等，另外亦有多款優惠孖寶。揀咗兩款以大澳命名的招牌菜，大澳鹹鮮蒸馬友 ($128) 同 大澳鹹香雞 ($128)，另外再加咗碟椒鹽鮮魷 ($108)。點小菜加 $20，就可以配白飯同老火湯。今日嘅老火湯係合掌瓜豬骨湯，湯水好清甜，滋潤解燥。先嘗鹹鮮馬友，魚肉鮮味充沛，肉質細膩，鹹香得嚟又有咬口，比起用豉汁蒸，更能突顯咸鮮風味。面頭的薑絲成功地消減了魚身過多的油份。平時好少會食鹹雞，呢個用木盤送上嘅鹹雞，味道真係唔錯。雖然只係點咗半隻，但雞件分量十足，雞肉又嫩又滑，香味非常濃郁，有肉汁又唔肥膩，入口鹹鹹香香，用嚟送飯一流。壓軸送上的椒鹽鮮魷，亦好有驚喜，鮮魷表面炸至金黃酥脆，內裡仍然保持到魷魚嘅鮮味，食落一啲都唔韌，加上椒鹽的香辣，相當惹味。