Mokumoku Yakiton (永光商業大廈)

营业中

休息中

星期六中午，約咗幾個閨蜜去食串燒，店舖位於銅鑼灣SOGO樓上，呢間串燒店特別之處係除咗有串燒之外仲有日本刺身食，滿足晒我哋幾個嘅需要。首先黎一個頭盤刺身，呢個set有晒我最鍾意食嘅帶子，海膽，同埋三文魚，而且海膽配埋青瓜，份外清甜，三文魚亦都好肥美，帶子仲要係厚切添，配埋少少檸檬嘅酸真係鮮甜爽口。食完刺身，開始入戲肉，我哋嗌左大量串燒，其中呢一個豚肉鵪鶉蛋卷，真係好有特色，豚肉包住鵪鶉蛋入口，係唔同層次嘅感覺。另外我哋嗌左個燒三文魚胶，呢個真係不得了，魚油燒晒出嚟，魚肉勁滑，而且配埋黑椒可以完全調出三文魚嘅香。鹽燒雞翼亦都燒得恰到好處，唔會話太乾，而且加咗少少海鹽，鍾意食雞翼嘅朋友真係一定要食。厚燒牛舌，亦係冇得輸嘅選擇，厚厚嘅牛舌，入口啖啖肉之餘仲有牛香。最後我哋嗌多個豚肉包荔枝卷，又係特色菜，薄薄嘅豚肉咬落去有荔枝嘅清香，完全係可以幫呢一餐解膩，為呢餐寫上完美嘅句號。