家嫂星洲美食 (已結業)

樸實無華 家鄉風味家嫂以前喺柯士甸路係超級人氣店，位少擁躉多，排仲耐過食。而家轉戰美食英雄地九龍城，店面大咗光猛咗，但我都驚無位，所以6點晚市一開就嚟。大蝦叻沙($85)叻沙成敗在湯底。家嫂講明所有叻沙整作需時，事緣每碗都會即時滾熱湯底，所以一上枱就芳香撲鼻。我凡食湯麵都好似食日本拉麵咁會先呷一口湯，呢個湯集椰汁、咖哩、蝦膏、葱花香味，微辣而唔嗆喉，將其他配料嘅味道都昇華晒。大蝦彈牙鮮甜無雪味，肯定用新鮮貨。未試過食叻沙連湯都飲晒，堅！香草雞翼($58)雞翼好細心咁切成單骨先炸，一上枱香草味攻鼻，炸得鬆化透心，一口食到鹹、香、酒甜三種滋味，令我有意外驚喜嘅小食，難怪聽見每枱客坐低都叫嚟食。星洲薏米水($23)同中式薏米水唔同，加埋香茅同薑，入口少少辛辣，但醒神暖胃。咸檸樂($23)咸檸味夠出，嗒落先鹹後甜，好醒胃。家嫂另一拿手菜式係肉骨茶，可惜一碗叻沙份量十足，食完無空間再試其他嘢，期待下次再探家嫂。