就是烤菇 (已結業)

香港要搞特色夜市，似乎只聞樓梯響，未見人下來！不如自己瓹窿瓹罅搵好嘢食好過。是晚路經柴灣，睇到樂軒臺一條街，聚集咗唔少特色小店，雖然位處街邊，但充滿排檔風味，全部即叫即做，熱辣上枱，咁就摺起衫袖試下啦喂！睇嚟睇去，呢個招牌寫住「二寶潮食」，易拉架印有「就是烤茹」又幾盞鬼咁喎！二話不說，叫老闆整咗個芝士帶子烤啡菇，大大個有酒店級size, 而且芝味濃郁，帶子雖切粒但入口嫩滑，我like呀！再點個辣味八爪魚，成隻上形態賣相夠嚇人，但超好味吸引，相機都爭住食先！再嚟多個香草雞翼，5大隻少少辣皮脆脆，有些少BBQ風味，飲品方面，只提供可樂一種無得揀，不過隔離就係便利店，都好方便！