牛魔 (已結業)

同幾位姊妹一行5人食晚餐，食到我成肚氣。食物，我覺得好食嘅！但食物同服務唔成正比。職業質素極差！首先坐底叫酒，見到餐牌寫買二送一，問個女侍應提供乜嘢牌子啤酒選擇，佢企喺到粒聲唔出，後面黎個戴眼鏡男侍應黎救駕，諗住會解答到條咁簡單問題。點知，個眼鏡男侍應回應: 你用電話落單，你自己睇！第一下，我原諒佢無禮貌，可能入世未深，而家啲後生仔可能係咁嘅溝通方式。再來，我朋友打開餐牌想叫杯果酒，問眼鏡男侍應介紹一下，眼鏡男侍應回應:前面轉彎位有酒吧！我已經即刻叫佢揾經理出嚟，佢話經理唔喺到。我專登問佢叫咩名，打算send email投訴，點知揾匀網頁都無投訴途徑，所以忍唔住要喺而到反映。最後，眼鏡男侍應過嚟幫手燒一塊扒，燒完問我剪幾多塊，我話5塊，因為5人食，佢話:難啲喎，平時剪兩塊！我問返佢: 你有困難洗唔洗我自己剪返？今時今日，香港飲食業服務態度再唔改善，只會逐一被淘汰。