焱丸水產 (已結業)

一向都非常喜歡和式餐廳，今次嚟到呢間專食東瀛美食嘅地方，當然要好好享受一晚！首先有三文魚牛油果沙津同牛油抄青菜，兩者都非常清新，尤其前者用上各款新鮮蔬果，包括牛油角，點上開胃沙津醬汁，以及三文魚蓉，打開今晚序幕。接著有天婦羅上場，新鮮即炸，上檯時候香噴噴，聞起上黎夠晒吸引。而且炸漿薄薄，食到脆身香口嘅感覺，再品嚐炸香菇，炸番薯等食材，當然要推介！三文魚富士山、以及原條飛魚，呢兩款刺身賣相上非常吸引，而且鮮味十足，不得不試。滿滿嘅三文魚同蟹籽鋪滿嘅壽司卷之上，魚油味香濃嘅三文魚、加上脆卜卜嘅蟹籽，完全係雙重享受。而有原條飛魚都係第一次品嚐，鮮味令人難忘，加上魚質鮮嫩無雜質，中意食刺身嘅朋友千其唔可以錯過！全晚最令人期待，就係磯燒帶子以及白蛤，係餐廳嘅魚缸新鮮撈上黎，保證夠晒乾淨無雜質。職員係爐上明火燒熟，再加上清酒同埋秘製醬汁，一邊散發香味，一邊提升海產嘅鮮味，令到帶子裙邊彈牙又易於咀嚼，帶子身又鮮味滿滿，而白蛤同樣出色，加上些少清酒，散發清香味道。最後仲有一客黑豬肉鍋，多款新鮮蔬菜加上清湯，有助消除整晚嘅油膩感，而黑豬肉相對油份較少，但同樣有豬肉爽勁口感，絕對係完滿嘅一個晚上。