金色不如帰 (國際金融中心商場)

营业中

休息中

聽到「過江龍」呢三個字其實我對呢間由日本來的拉麵冇咩期望。抱著冇期望便唔會失望嘅心態嚟食呢間嘅拉麵就啱晒。我食咗個「貝汁醬油拉麵」(HKD128)。碗拉麵對我嚟講正常size(男士們應該唔夠食)不過麵質偏硬。碗內有一塊低溫叉燒同埋一 塊薄到一夾就散開嘅豬腩肉。豬腩肉喺未用筷子夾之前賣相的確係幾靚仔，三層肉層次分明，好清楚見到豬肉跟肥膏。成碗拉麵唯一可以讚嘅就係個湯底，用蜆湯、豬骨清湯、魚清湯製成，味道偏淡但勝在冇味精。黑松露醬+牛肝菌油為呢碗拉麵添加了少少色彩和香氣。隻溏心蛋要另外加錢 ($15)。好彩有加咗隻蛋因為食完嗰兩塊肉之後覺得自己好似冇食過任何配料，只係食緊碗有個湯底ok嘅拉麵😂擁有米芝蓮一星名銜的拉麵店，食完之後覺得真係好普通，價錢預咗會貴啲。除咗個湯底我真係諗唔到其他特別之處，可能係我唔識欣賞啦。