一風堂 (希慎廣場) (已結業)

星期日，同阿女拍拖兩個人嚟食拉麵，好耐冇嚟過一風堂，因為佢唔算係最出色，有其他拉麵店好食過佢。但係今日唔知點解突然間好想食佢，所以就同阿女上嚟，入到嚟環境好舒服，有超級大玻璃窗，彩光充足，坐得好舒服。喺門口見到個期間限定海老豚骨拉麵已經吸引咗我眼球，確定咗唔辣之後(因為同亞女share)就落單👍🏻完全冇懸念拉麵一上枱，同圖畫冇太大分別，湯底係濃厚龍蝦湯，加埋秘製海老香油，有一隻香煎虎蝦，櫻花蝦，特製海老味噌，兩塊叉燒，火箭菜，半熟蛋。叉燒可以選擇豬柳肉，豬腩叉燒，或者炙燒豬腩叉燒。湯底非常濃厚，充滿龍蝦味，愛蝦人士非常值得一試。虎蝦亦都煎得非常之香，冇Hea你。成碗面嘅每一樣嘢都充滿蝦味，諗起都再想返嚟食。其他拉麵店都有蝦味嘅湯底，呢度嘅湯底係最濃厚，偏向似西餐嘅lobster bisque，如果你偏向冇咁濃嘅，咁另外果幾間蝦味拉麵店可能會更適合你。