鴻發糕品 (已結業)

BF今年生日因為另有特別有意思，一向不愛食蛋糕既BF只愛食壽包，所以三妹都特意去呢間曾經有電視台訪問過老字號糕品店特訂大大壽包同埋壽包仔，一共廿九件，送俾BF作禮物之一。準時取貨，1揪2袋。但回到家一打開個袋見到啲壽包，即時大失所望，壽包賣相太核突。個大大壽包中間包面仲要爆裂又"巢"皮。啲壽包仔大細不一，形狀又唔係壽桃樣，真係好求其，慶幸係送俾BF，佢一見到咁多壽包都已經好開心，如果俾著係送俾老人家，一定俾人鬧到爆炸。跟住就蒸咗個大大壽包同埋4件壽包仔同BF一齊試下。當品嚐大大壽包，真係似食饅頭多過係食緊壽包。訂咗一斤重既大大壽包，個包一定足秤有一斤重既麵粉，但係啲黃蓮蓉餡少到無人有。一個一斤重既大大壽包，啲黃蓮蓉餡居然只佔個包既(計盡)三份一範圍。整體上真係食麵粉多過食餡，同食饅頭無分別，啲黃蓮蓉餡味道又完全不似蓮蓉餡味，BF仲食係花生醬味添！跟住試埋啲壽包仔，嘩，又係麵粉多過餡，啲餡得嗰一茶匙仔，真係呃錢呃到爆，雖然一袋廿九件壽包夾埋都係百零蚊啫，但係都唔駛咁呃啲後生女！食壽包唔係貪佢有蓮蓉餡，唔通真係貪佢個包樣似隻桃得意咩！