Zeng (已結業)

諗住開開心心食個brunch，點知食到成肚氣😤貴為Openrice每週熱門餐廳第17位，但服務態度竟是如此差，就算幾好食都假（亦未見特別好食）！第一次見啲客連環拍檯投訴，俾discount又如何⁉️ 首先講明harbour view brunch，但竟然係坐室內，搲晒頭？之後入座咗半個鐘連一杯水都無斟過俾我，上菜速度勁慢，我以為去咗食法國餐，上甜品又唔執檯不特止，連食甜品嘅餐具都唔俾我，唔係諗住要我用返食烏冬枝叉食呀？講返啲野食，頭盤係好食嘅，魚子醬配合醬油漬三文魚壽司，沒有一點違和感，最特別係個和牛他他，混合咗蔥花同蛋醬再配合脆面包，口感味道一流。好可惜無咗我愛嘅海膽帆立貝，換咗個紅蝦刺身，有點失望....慢煮五花腩，醬汁香濃，但可惜火候控制得唔好，舊肉變得好嚡。天婦羅係最差嘅，個炸粉出晒事，一啲都唔脆；卡邦尼烏冬同芝士蛋糕就不過不失啦，但個Brûlée竟然係無蛋味，得個「甜」字。餐廳環境係唔錯嘅，有格調同仲有個露台可以飽覽維港景色，個brunch本身係幾吸引，仲可以加錢任食生蠔同飲酒，但質素如何就不得而知啦。