大喜屋 (已結業)

大喜屋心血來潮食一個刺身嘅lunch ,上網睇咗好多間，都揀唔到食邊間，把心一橫，不如去食放題啦，種類又多價錢又唔算貴。為咗要就朋友係港島返工，就揀咗銅鑼灣大喜屋，其實而家已經開咗好多間大喜屋，今日試番最basic一間，貪佢比較小人，上菜快的，爭取一個鐘頭嘅午飯時間。未夠12點已經去到準備安排入座，人龍都唔算長，好快就被安排卡位。座位比較緊密,不過唔緊要，最緊要係要食一個快速嘅午餐。刺身嘅種類同一般樂天大喜屋、殿大喜屋差唔多，都有12款選擇，非常新鮮，帶子雖然唔算大隻，但係好鮮甜，蝦嘅刺身都有兩款，啱晒我蝦迷，虎蝦大隻又鮮甜啦。除咗一般嘅刺身選擇之外，仲有松葉蟹腳任點添，肥大肉厚。最欣賞係劍魚腩，同埋油甘魚刺身，兩款都油脂分布平均。熟食方面，羊架係個人心水選擇。另外手卷，以為係迷你size ，點知原來係好大件，食咗兩件已經覺得好飽啦。飲品方面，並唔係自助形式，需要用點餐紙order。食完刺身，即刻好想飲番杯熱茶暖下，呢度除咗有綠茶之外，竟然有碧螺春，真係有啲意外，連中國茶都有，相當唔錯！此外，服務員嘅態度非常好，經常有耐性地回答隔離枱嘅問題，友善有禮！