九鬼居酒屋 (耀華街)

营业中

休息中

自從有返晚市堂食之後，不停咁約朋友見吓面，今日就約咗個港島朋友去銅鑼灣meet一meet。大家都話唔算好肚餓，所以就揀咗九鬼居酒屋食啲嘢兼飲番杯。餐廳入面嘅佈置配合店名，周圍都見到日本鬼。首先嘅前菜就揀咗刺身沙律，沙律菜之上有滿滿嘅角切刺身，最後仲加上藏紅花。唔同嘅刺身包括有三文魚、吞拿魚、劍魚腩等，粒粒飽滿。芝士三文魚卷擺盤已經夠精緻。入面捲有三文魚同厚厚嘅芝士，再配搭青瓜絲，感覺清新唔油膩。嚟呢度當然要叫返一啲佐酒小食，炸池魚仔係我近年嘅至愛，而且份量都好多，感覺就好似五餅二魚咁，食極都仲有。另外當然唔少得唐揚雞軟骨，咬落爽脆，甚有口感，配有日式芥辣沙律醬，非常醒神開胃。之後就揀選咗幾款串燒，其中厚切牛舌味道甚有驚喜，形狀四四方方，口感更爽口彈牙，令人想一試再試。雞翼外皮燒得非常脆口，而入面嘅肉質仍然保持鮮嫩，用嚟送酒一流。翠玉瓜簡單燒熟之後輕輕灑上薄鹽，味道亦唔錯。同朋友飲番杯，享受一個歡樂嘅晚上。