一風堂 (新港中心) (已結業)

經朋友推介，決定與友人去一試。好多人排隊，聽講名氣幾大的。友人食白丸拉麵，而我就食辣嘅赤丸拉麵，可以選擇麵嘅軟硬程度，友人要適中，我則選擇了軟身（我係連食意粉都鐘意軟身少少的怪人）。拉麵湯頭都幾濃郁，幾順口，起碼唔似有味精嗰種死鹹，所以食完個麵連湯之後，都唔會覺得口渴。叉燒肉肥瘦適中，煮至軟淋，唔會覺得柴／嚡口。叉燒角包，個包身夠熱同軟身（好似又熱又鬆軟嘅曼頭咁）加上裡面嘅叉燒連醬汁好夾好好味，一啲都唔會覺得肥膩，我值頭有衝動想再追加多碟黎食。（可能因為我鐘意食片皮鴨，而佢就有啲似係嗰類演變出黎嘅飽肚版咁）好好食，要趁個包仲熱就好快啲食！仲有個小食，炸牛蒡，無咩特別嘅味道，好似食薯片咁，好脆。服務員好勤於幫客人添水。