心之食堂 (裝修中)

今日忽然好想食日本野，係OpenRice搵到呢間喺銅鑼灣百樂中心嘅居酒屋，Menu有炸物，燒物，刺身，卷物，石鍋飯等等… 好多選擇，決定同男朋友嚟食晚飯。海膽蟹籽杯賣相非常精緻，啲海膽好鮮甜，撈埋啲蟹籽一齊食，夠晒開胃，唔好睇佢細細杯咁，其實份量都唔少。吉列炸蠔面頭炸得好香脆又熱辣辣，肉質肥美，咬落去好Juicy。蒜片牛柳粒石鍋飯，牛柳粒嘅份量好多，好有肉汁，加埋啲蒜片同埋底下嘅脆脆飯焦一齊食，好香口，份量夠晒兩至三個人食。韓式芝士炸雞賣相超級邪惡，炸雞上面鋪滿好多芝士，仲可以拉絲，記得一定要趁熱食！燒魷魚係原條上既，上面搽滿咗照燒汁，味道非常夾，入口肉質煙韌彈牙。燒茄子上面鋪滿咗好多好多蒜蓉，燒得好香，非常惹味。總括黎講呢間居酒屋環境食物都唔錯，下次會再黎！