渝味曉宇重慶老火鍋 (太子集團中心) (已結業)

唔知係咪因為之前堂食無晚市既關係，所以而家都習慣左會早左食飯，其實早食飯都有好多好處，一黎無咁多人，二黎可能會平d，三黎仲可以無咁肥添，所以而家去到5點就會開始好肚餓。今日喺尖沙咀行街行到咁上下時又開始餓餓地，見呢排開始轉涼梗係要打邊爐啦，於是就去左呢間我想試好耐既餐廳，果然無令我失望。首先一定要讚下個環境，其實我有時都好怕去d喺商廈入面既餐廳，因為硬係會覺得環境唔舒服。呢間餐廳環境絕對一百分，乾淨，企理，座位闊落，完全無油煙味，最正係個大落地玻璃，我5點半到啱啱好仲可以睇到個日落，而家光猛得黎帶點柔和，所以食得勁舒服。食物質素當然無得彈，我想食呢間好耐既原因，係因為川菜打邊爐同普通打邊爐唔同既地方，首先湯底既麻辣感覺，唔會只係一味既死辣，係辣得黎帶香既感覺，雖然我最後都係怕辣無叫到佢最出名既九宮格，但係鴛鴦鍋都已經好足夠。其次係食物品種方面，呢一間有好多好特別我又想試既火鍋料，好似重慶耗兒魚，勁滑勁有魚鮮味。叫好絕對要讚既係食物質素勁高，好似蝦滑真係好足料好多蝦，鴨血好滑好入味，桂花蚌勁鮮甜，萵荀好爽口，肥牛更加係無得頂既。呢間渝味曉宇絕對係充滿特色非常值得一試既餐廳。