佳記雞煲小廚 (已結業)

雞煲都食過幾次，好耐以前食過一間好好味，但就執咗，今日比我地食到間暫時黎講最好味嘅雞煲。好彩早一步到，門口已經要排隊。好，坐低睇吓有咩好食先。首先來個煲前小食，尖椒皮蛋，食落微微辣，好味！豬手雞煲，揀咗中麻中辣，呢個辣度對我哋來講啱啱好，成個煲放滿芫荽，增添雞煲風味同減少油膩感。豬手好有肉地，炆得好腍，係骨膠原呀。加咗湯之後，準備打邊爐，個湯底依然好濃郁稠身。呢度仲有得無限加雞。食完個雞煲已經飽咗一半，所以叫咗少少邊爐料，美國雪花肥牛，雪花幾靚，食落牛味重，豬肚幾爽口、響鈴就炸得好脆，放落去索晒啲湯，好邪惡。仲有各式飲品都係任飲。