Shine (已結業)

朋友生日，當然要食好啲，朋友自己揀咗來Shine慶祝。店舖嘅位置非常方便，而且室內座位寬敞舒適，裝修亦都非常有格調，見好多情侶都黎撐枱腳。我哋點左兩個湯、兩個主菜、兩杯飲料。牛肝菌蘑菇湯：真係有幾快乾牛肝菌片放喺湯入邊，而且湯入面盡是搞碎左嘅蘑菇粒。總括來講呢個湯係非常極度重蘑菇味，非常好味。龍蝦湯：龍蝦湯味道都非常濃郁，飲得出同平時飲開嘅罐頭龍蝦湯係好唔同，呢個好飲好多。芝士菠菜意大利雲吞配煙肉南瓜汁：意大利雲吞皮唔會好厚，厚薄適中，雲吞裏面係菠菜茸加芝士，芝士味道好濃郁，啖啖都係芝士味。煙肉南瓜汁都好好味，為味道提升咗一個層次。脆炸德國鹹豬手配蜜糖芥末醬：炸得超好食，外皮非常非常脆，最難得係鹹豬手肉好林，基本上都唔需要搵刀切。鹹豬手唔會太鹹，伴碟仲有酸菜，食得太多炸嘢中和下唔錯。Banana chocolate：好香好香香蕉味，加埋朱古力，呢兩樣加埋係絕配。Passion fruit lemon soda：呢個非常清新好飲，熱情果味好濃，最特別嘅係，佢上面放咗好多粒好似魚子嘅東西，食落去好有驚喜，因為粒粒裏面裝住嘅係熱情果汁嚟㗎，好特別！