燒肉 帝 (已結業)

將軍澳呢個新商場最近食肆都已經入晒伙，今次經過就試試呢間裝修格局好似幾靚既燒肉店先。未入場先玩一玩小遊戲，只要成功㩒到10.00秒就可以一位免費食放題！最後…9.99 差啲就可以唔使埋單😭入到去環境好日式庭園feel 。每位入場都會有圍裙同口罩套，非常貼心，而且每人額外再送黑魚子帶子，味道鮮甜爽口，唔苦，黑魚子又可以增加口感，成個好有層次。調味料方面選擇好多❤️，有即磨黑胡椒、岩鹽、檸檬、三款燒肉汁，左邊醬油甜甜地幾好食、中間係麻油同鹽醬，麻油味勁濃又香 加埋啲肉簡直食唔停口、右邊就係柚子醋，沾柚子醋個味清新啲，酸酸地又有啲柚子香，好開胃。入正題，今次點既呢個set係澳洲和牛，有好多唔同嘅部位可以試，例如三角肉、肉眼頂、肩肉，啲肉冇乜筋，牛味都幾濃。鍾意食海鮮嘅都有選擇，廣島蠔好鮮甜，蠔味勁濃。驚喜嘅係呢個set可以叫羊架，當然馬上試試，羶味唔太重唔太鍾意食羊應該都可以接受到，而且口感好好，外脆內軟，值得一試。我地除咗燒肉外都點左個關冬煮，特別出色嘅係蘿蔔夠淋夠入味又冇渣 。除咗食物質素，特別想讚就係抽風系統做得幾好，唔會煙霧彌漫，都唔會好重油煙味，即使食完全身都唔會有味👍🏻