為食火鍋公司

营业中

休息中

呢間人氣放題火鍋店，每次經過都見到好多人，已經想試好耐，嘢飲有好多選擇。呢間火鍋店都幾企理，佢個食法幾特別，會分開咗前菜、刺身、火鍋一層層咁樣可以食，但係每食完一層之後，就唔可以返番轉頭。前菜有炸瘋薯條、鮑汁雞腳、唐揚脆炸雞、蟹籽沙律同酸甜炸大腸，我覺得最好味嘅係鮑汁雞腳，整得幾入味，同埋我見個個都有加多幾隻。之後就上三點刺身，有三文魚刺身、赤貝同埋赤蝦，全部都幾新鮮。之後叫佢上竉竉雞煲叫咗個小辣，雞煲都幾香口，中間唔記得咗攪拌頭嗰個，所以整到燶燶哋，食咗一轉已經開始有啲飽，之後就開始食火鍋。湯底就叫咗櫻桃鮮茄薯仔湯，佢有兩款一次性嘅食物，分別係為食牛肉拼盤、為食海鮮拼盤。牛肉我最鍾意就係黃喉，咬落去好爽脆，海鮮隻生蠔都好鮮甜。之後任食嘅牛肉有牛腰脊、牛胸腹、肩胛肉，任食牛黎講都算靚，好重牛肉味，食咗起碼十幾碟。紫菜響鈴、 炸魚皮，兩款都夠脆。佢個濃汁牛肉丸，爆汁都幾正喎。珍寳蟹柳真係超級大條，又係幾好味。食埋個菜，真係超級飽。