香港味道 (已結業)

前幾日又同男朋友去左新蒲崗食飯，今次去左間叫做香港味道的茶餐廳，因為佢咩都有得食，有港式，又有台式等的不同食物，我叫左個晚餐b，蒜蓉火腿豬扒飯，而男朋友就叫左個台式肉燥雞扒飯。坐左一陣就先上例湯，都叫清清甜甜，味道ok，但未至於好特別。之後飲品我揀左奶茶，正正常常，我覺得佢茶味比較重，我會比較鍾意啲茶味重的奶茶多啲。主菜方面，蒜蓉汁的味道適中，都係幾合大眾口味，而火腿有煎過下，唔係白烚，所以會比較香口，豬扒就有炸過，炸完又唔會話大乾身同好硬，連埋汁連埋飯一齊食，都幾好味。而男友的肉燥飯，呢個肉燥飯的配料都幾多，有粟米粒和香蔥，仲有啲肉燥幾好食，但就其實唔係太似台式的味道，而係比較似魚香茄子個種有芡汁加肉碎，而雞扒都一樣有炸過，雞扒味道ok，表皮香脆，入面又無變得太乾，而且有調過味，係黑椒雞扒，所以都ok。以下評分以5⭐️為滿分推介⭐️⭐️⭐️