彈彈旦 (已結業)

旺角，可謂全球賣小食競爭最大嘅地方，全球各地你諗到甚至想像唔到嘅都會有得賣，要留住貪新忘舊嘅香港人嘅心，除咗夠噱頭，好食先係王道。行過登打士街，幫襯SELFIE 咖啡(見另文)，之後見呢間舖試業中，招牌紅紙都未搣，連賣咩都未知，唯有喺餐牌搵答案。原來係主打賣魚蛋，但唔係傳統咁一大煲滾住比你揀辣定唔辣咁DRY,而係有四種醬料比你揀。舖仔細細，裝修簡單實用，各樣搵食工具放得井井有條，連老闆在內只有兩個人一腳踢，但態度親切積極，做ORDER都乾淨俐落，充滿幹勁。初搾椰子油咖哩汁魚蛋$20/10粒我認為，要公平評價魚蛋，都係試最傳統嘅咖哩汁。先由魚蛋講起，同其他魚蛋檔，用預先炸過嘅魚蛋唔同，係用白魚蛋，食落真係好彈牙，魚味比較真。本身唔會好重味，配醬汁食比較正。咖哩汁都與別不同，味道偏甜而且比較杰，似印尼串燒嘅沙嗲汁，用嚟撈魚蛋，黐實晒成粒，食落微辣少甜帶花生香，又係另一番風味。日本天婦羅金黃炸蛋$20/10粒白魚蛋蘸上天麩羅脆漿，再放入涫油炸，由於即叫即做，大概要等10分鐘。店方會灑上淮鹽調味。由於天麩羅漿身比較薄，唔會儲藏過多油份，表皮咬落非常酥脆，彈牙嘅魚蛋，少少鹹，多多脆，好快又消滅晒