心之食堂 (裝修中)

朋友話有心事想搵人傾下，我就約左佢黎呢間自己都幾鍾意既日式小店食飯傾下計。店舖面積雖然唔大，用上好簡單既裝飾，但正正係因為咁好有家庭feel，仲有中學時期好流行既漫畫書。食物方面，我地首先要左2款刺身，分別係帆立貝同甜蝦。帆立貝係珍寶size，入面夾住一片青瓜，十分新鮮。甜蝦一碟有4隻好鮮甜，排排坐喺一張好似木椅既器具，貌相可愛。刺身之後當然係壽司，我地今次要左李小龍卷。其實入面係有炸蟹鉗、牛油果同青瓜，而外面就有好多蟹子，食落脆卜卜，上面仲有魚子醬，聽到都想像到有幾豐富。然後就到鹽燒大啡菇，個人認為咸左少少，但燒過既菇的確好香，而且仲好juicy。之後就要左2個邪惡包，佢亦係我黎呢間店既主要原因! 其實係紫菜包住帶子再包鵝肝。煎到半熟既珍寶帶子包住入口即溶既鵝肝，真係十分邪惡，十分美味! 接住就有另一個呢度出名既心之蛋卷。甜蛋卷入面有芝士、三文魚肉同蟹子，而且蛋煎得好嫩滑，真係好值得一試!最後要左個蒜片牛柳粒石鍋飯，用石鍋呈上保持住熱度，但一直熱住既牛柳粒一D都唔un。而飯入面有大量蒜片，真係好香，加埋個汁甜甜地撈飯一流。今次再黎食仍然都保持到水準，食得出廚師既用「心」。