譚仔三哥米線 (已搬遷)

不嬲都鍾意三哥啲豬潤，雖然未到黃沙潤，但都差無幾。「三哥」入貨真係利害！

本人喜愛中辣嘅湯底，每次都會飲哂。汋一匙辣湯，再將啲豬潤浸係裏面，一啖食哂，真係回味無窮。

話說前幾日去北角呢間又食中辣豬潤+腩肉+豬肉，因為無食晏，所以六點去食都好肚餓，到埋單先至知原來自己唔夠錢。點知收銀亞姐不但冇黑面，仲笑住口話「唔緊要，你去扲錢，等陣俾返我啦~~~」

咁我咪問：「使唔使放底啲嘢做抵押咁呀？」

亞姐笑住拎吓頭「唔使，你一陣再返嚟俾錢啦！」

咁我就飛快去最新嘅匯豐，十幾分鐘先再返嚟俾埋條尾數：12大元

亞姐仲笑住話：「唔緊要，你唔使咁緊張，好似啱啱跑完咁。」臨走時，又再同我講多謝！

呵～～～～～～我都未見過咁好嘅收銀亞姐。真係有啲擔心佢俾其他霸王食客扼，走佢數，咁佢咪要自己 “um” 荷包？