尚上下夏 - 養生雞煲火鍋 (已結業)

凍天識食一定食雞煲火鍋, 暖胃又補身. 呢間尚上下夏係第二次幫襯, 兩次都無令我同班姊妹失望.雞煲除咗有得揀辣度之外仲可以揀部位同埋要鴛鴦鍋. 我地4個女仔今次揀咗要全脾, 一邊小辣一邊唔辣, 雖然要全脾, 但感覺份量仲多過要雞全隻, 啖啖肉, 好味!辣味做得唔錯, 幾有層次, 唔會一味得個辣字,仲帶有香麻味同埋少少甜味, d雞都炒得好香同埋入晒味, 最鍾意佢個豬皮, 超級索汁, 實屬精華所在!湯底方面, 我地揀咗蕃茄湯同埋雞湯. 侍應都幾細心, 有問我地想唔想撈起D雞汁先放湯, 我地想食埋D雞汁, 所以都保留咗係個鍋度. 所以一開始個湯已經好夠味, 之後打邊爐的食材焯熟咗都唔洗再點豉油!我地叫咗海鮮拼盤, 上到枱先知係好大的一盤.....d料好新鮮, 最鍾意佢個花膠, 好滑好吸味! 另外佢個花甲, 蟶子同埋帶子都好新鮮同好大粒, 帶子好甜同埋厚肉. 仲有連殼鮑魚大大隻, 好鮮味, 不過我地掛住傾計滾過頭, 下次要記得焯一陣就拎上黎食!雖然餐廳比較人多有少少迫, 但上菜速度都幾快而且都好企理, 我地4個人食到暖笠笠好滿足呀!