The uniek

营业中

休息中

先講總結：環境唔錯、服務好；食物賣相靚，適合打卡，但筆者光顧當日竟然搭配即棄餐具😰，失色不少；味道方面，普普通通，味覺享受冇視覺效果咁吸引。換句話說，睇落上品，食落中等，感覺就似欣賞明日花綺羅，成個人都好精緻、冇得挑剔，但埋牙時總係覺得唔夠實用。是次用膳「珍珠帶子菠菜忌廉意大利麵」 + 「法式貴族麵包」 + 薯條🍟 + 兩支飲品 = 盛惠$354。南豐紗廠食一餐都係差唔多價位。「珍珠帶子菠菜忌廉意大利麵」🍝：忌廉滑，但菠菜味不足，整體感覺好普通。如果要讚，係個意大利麵有返適當嘅韌度，唔似一般餐廳煮得太淋。「法式貴族麵包」：個樣真係冇得彈👍🏾！伴碟沙律個味調配得唔錯，濃淡適中。麵包相當鬆軟🍞。個（芒果+牛油果+帶子+金槍魚）餡俾人感覺都幾fresh。不過，上述評語係分開包還包、餡還餡食嘅感覺，如果麵包同餡料夾埋一齊食，筆者認為冇咁夾之餘，仲會影響整體發揮。點解咁講呢？第一，包皮太厚，麵包同餡料好難一啖食到入口，唔夾之處；第二，無論麵包定係餡料，味道都係偏淡味，所以一齊食嘅時候冇乜味蕾上嘅刺激，倒不如一啖麵包、一啖餡料分開食仲好味啲。吖！個薯條🍟，$28，再望望個賣相，唔怪得老麥生意好呀。