日本料理鈴木 (已結業)

又到想食日本懷石既日子，唔想去灘萬，決定搵一間隱世既。搵到呢間chef 由灘萬自立門戶既玲木日本料理。入到去，有日本簡約餐廳感覺。叫左9道菜懷石。第一道前菜，日本海膽同豆腐，海水味濃，正！之後係三色sashimi, 拖羅不是頂級，但全部好新鮮。之後再黎咩呢？原來係香箱蟹蒸蛋，蟹肉幾甜，溶入蛋後可帶出鮮味。下一道菜是日本黑豆，好甜加上金薄，另有日本柿夾層芝士，仲有日本蘿蔔配烏魚子，傳統日本食法。蔡蘭都有介紹過喔！然後是什麼呢？日本芋頭配烤魚肉，這個菜的芋頭竟比烤魚更好味。再來是蟹肉配豆腐，食得出蟹肉很新鮮，但味道會是比較淡。之後的一道菜，記得食魚皮呀！這個烤魚，肉還是很可口，但師傅炸到個魚皮超級爽，非常香口，條魚嘅魚鱗不會除去，被炸到好脆，好好食。下一味菜，蠔釜飯，加上點香菜，師傅說明味道會比較淡，可以接個人喜好配漬物食。最後一道菜是北海道密瓜，是很好味，但不會好似靜岡密瓜咁甜。再配自家制芝士cream 及士多啤梨，不錯。總結，是非常好味及舒服既一餐。服務態度超好，師傅好好人，我推薦此餐廳給大家。