好旺角麵家 (已搬遷) 新店位置

周五晚去十大進修, 一心諗住去樂園食個牛丸麵, 但又見好耐無試好旺角呢類舊式粥麵店, 即管一試. 原來係自己有眼不識泰山...店入便都寫明最出名係炸醬麵, 周圍亦見個個都食緊, 麵檔處玻璃柜仲有一盤二十幾小碟炸醬擺定左係度, 心諗應該係呢樣. 但係見對面個阿叔啜豬手啜得咁開心, 加之隔離枱又有兩位阿姐咬緊豬手. 心念一轉, 隨口就up豬手麵一碗.店仔細細, 坐到爆哂. 人多真係要等一陣. 十分鐘度, 肥阿姐終於送貨. 先試口湯, 味道好平實, 但唔覺係師傅出品. 麵無鹼水味, 唔算彈牙. 呢兩樣絕對唔會值廿二蚊碗. 咬啖豬手先知道不得了, 呢度既豬手唔會瘦到豬仔腳咁, 得層皮, 皮下有少少一層脂肪, 所以D皮食落覺得淋淋地. 但好食唔止在於淋, 更重要夠膠. 肥既豬手好肉又易淋, 但係無乜膠質. 豬手夠膠基本上唔便有咩肉, 食到啜埋骨頭就好過癮. 炆得夠既豬手連骨頭都好軟, 夠牙力就咬碎埋D骨去吸髓中精華. 好旺角既確係正貨. 廿二蚊三件正斗既豬手, 抵到無野講. 想買服務同地方, 可以去隔離香港仔/樂園, 但係佢地既豬手都唔合格.