韓燒大叔

营业中

休息中

平時已經有留意開呢間韓燒大叔，因為佢對住旺角站D出口位置方便，而且價錢都OK，所以今日有時間就要試吓佢。見到呢間環境唔錯，唔會勁大油煙，感覺都幾正宗。肉類大約有20款，一啲比較靚嘅部位，例如澳洲穀飼黑安格斯内裙肉丶澳洲草飼黑安格斯封門柳、霜降一口牛、美國安格斯下肩胛肉等等都有得揀，有部份嘅肉已經有醃製過，燒起上嚟相當野味，如果嫌唔夠味仲可以去出邊嘅自助區選擇調味料，包埋生菜食更加正！刺身簡直係必點，有三文魚、帶子同埋蝦，肉質鮮甜，估唔到韓燒都有呢一個水準嘅刺身！自取區除咗有唔同款式嘅調味料之外，仲有新鮮嘅蔬菜，例如三色椒、菠蘿、南瓜、翠肉瓜等等。另外仲有唔同款式醃製好嘅韓式小菜，包括醃蘿蔔、醃小白菜同埋韓式泡菜，解膩一流。甜品嘅話最好食就係嗰個蛋捲，有四種款式，當日有桃味、檸檬味、提子味同埋蘋果味，做飯後甜點啱晒。總括嚟講，晚市每人298就可以有任食韓燒，個質素同價格都算唔錯。