阿來泰式地道風味

营业中

休息中

講起泰國菜，九龍城大把好選擇，但旺角又食邊間好？今次介紹間通菜街一間幾旺場又抵食嘅「阿來」。普通茶記式裝修唔好expect可以打卡，入面有幾張大圓檯坐十幾人，好啱多人gathering。Order咗個視覺效果最震撼嘅黃咖喱軟殼蟹法包，喺鬆軟麵包上加兩隻大軟殼蟹同黃咖喱，分量超勁，夠三四個人share！麵包熱熱地，雖然外皮唔係脆果隻，但係好吸充滿椰香嘅咖喱汁。而傳統嘅生菜肉碎包亦炒得好夠鑊氣，齊備泰式酸辣元素，個人認為可以再辣啲，同埋如果多幾塊生菜就好啦。辣椒膏蝦頭油海鮮炒飯亦出色，炒飯粒粒分明，仲有好香辣椒膏同好多海鮮，係幾好食嘅炒飯。食國野必飲冰，叫咗三色椰汁冰，好夠消暑解渴。叫咗咁多野食，埋單都係三百幾蚊，感覺幾抵食，難怪閒日都咁旺場，餐廳兩層都坐滿晒，仲有幾檯都食蛋糕同朋友慶祝生日，氣氛相當熱鬧。