燒烤堂 (已搬遷) 新店位置

繼續串燒之旅黎到呢間位於旺角嘅燒烤堂。唔同款式嘅串燒同燒物令人花多眼亂，當中都有唔少係非常有特色同創意嘅配搭。鹽燒白鱔 $48厚身白鱔燒到皮脆肉嫩，肉質爽彈，美中不足係有少少碎骨。鹽燒和牛牛小排 $48牛小排肉質腍嫩，非常容易咬開，入口充滿油香。鹽燒豚肉荔枝卷 $22以豚肉卷住原粒荔枝黎燒，香甜可口嘅荔枝肉完全抵消咗燒豚肉嘅油膩感。焦糖青蘋果鵝肝多士 $88底層係烘到香脆嘅芝士厚多士，上面放咗爽脆嘅焦糖青蘋果薄片同主角燒鵝肝，口感味道層次非常豐富。中切鹽燒牛舌芯 $28牛舌芯肉質爽口，牛味香濃，師傅加咗少少鹽更能帶出牛舌嘅原汁原味。牛油果豚肉卷 $28燒到焦香嘅豚肉，加上燒過之後香濃幼滑牛油果，入口就就好似食緊濃濃嘅牛油果醬咁。蟹膏燒飯團 $38飯團嘅表面燒到焦脆，形成飯焦，面頭鋪滿蟹膏，用紫菜包住一齊食，每一啖都係蟹膏嘅甘香。蒜蓉燒蟶子 $58蟶子新鮮，大隻厚肉爽嫩，揀咗用蒜蓉燒，蒜香味十足帶出蟶子嘅鮮甜。雞皮墨魚滑 $38用雞皮黎包住墨魚滑做串燒真係第一次食，香口嘅雞皮散發濃濃雞油香，包住彈牙墨魚滑，非常有特色。椒鹽燒多春魚(4條) $32多春魚燒到酥脆，食落成條脆卜卜，非常香口。