金子半之助 (奧海城2期)

营业中

休息中

去奥海城买完嘢，嚟金子半之助晚餐。一坐低就有杯黑豆茶，成个壶摆低自己随便加，啱晒钟意饮茶嘅我。餐牌不时有期间限定或者推广优惠。今次叫咗江户前天丼，加$38将海老升级做大只啲嘅车海老，其他材料有穴子、小鱿鱼天妇罗饼、温泉蛋、海苔同荚豌豆。原本主角系穴子，即是星鳗，比一般鳗鱼冇咁肥、肉质较纤细。升级咗嘅车海老，有些少喧宾夺主，size够大，味道又比穴子突出，肉质爽口；今次一次过试食晒两种口味，开心。其他食材处理得宜，舖上天妇罗粉经胡麻油炸后变得香脆，而又不失新鲜原味。另外叫咗软壳蟹迷你天丼加温稻庭乌冬。软壳蟹味道鲜甜浓郁，乌冬够滑溜，汤底又好味。木鱼、葱花、天妇罗粉、海藻等配料放喺木盒自己加，随心之余，又有仪式感。两个set都有跟前菜，而佢嘅古早秘传天妇罗酱汁分开另上，可以按个人喜好用多用少，又唔会浸淋啲天妇罗。而丼碗个底系空心嘅，系日本嘅传统工艺，可以更好保持食物嘅温度，边食边倾偈，食物都冇咁快冻。简简单单一餐，店员都几有礼貌，价钱唔算平，但整体体验唔错。