淺月 (已結業)

復活節假期最後一日啦，今晚就去咗大角咀嘅日式小店淺月，由奧海城行過去約7-8分鐘到！呢間小店好多人已經有推介過，話老細係一腳踢，我哋有晒心理準備，要耐心等候美食！首先我哋揀左大阪黑咖喱吉列珍寶巨海蝦配飯及男爵薯餅！其實等左15分鐘到，就得食啦！咖喱飯份量都幾大份，同埋真係巨海蝦！三隻蝦好大隻，同埋蝦係彈牙架，唔係淋身，正！男爵薯餅配咖喱汁，真係無得頂！咖喱飯上面嘅蛋煮得啱啱好，好滑身而咖哩汁有少少微辣，加上飯又有少少海苔粉，好惹味！同埋飯同咖喱汁份量又係啱啱好，唔會食剩太多汁！另外仲叫左一份極上安格斯牛肉野菜鍋，本身我哋以為會有迷你爐仔，好似打邊爐咁，原來送到枱上已經係煮好咗，牛肉上面有少少黑胡椒，令牛肉味道更加出色，跟住湯底好正，，勁濃郁牛肉湯，有好多野菜，又有好多野菌，當然仲有口感一流既稻庭烏冬，配呢個湯底，真係好正!除左嘢食好好食，老闆一腳踢，招呼好好，好有禮貌，講再見又會講埋我個名，好想同佢講「辛苦曬」！同埋我哋一定會再見架🥰