東京築地拉麵 (已結業)

旺角食飯大把選擇，所以星期日同朋友無預早揀定餐廳，行街行到攰先決定。大約8，9點行到雅蘭中心附近，上openrice睇下有咩選擇～🤔雅蘭中心大部分連鎖餐廳(一壽司、意粉屋、樂天皇朝)都食過，見到雅蘭一有間東京築地拉麵，拉麵$60幾蚊碗，都幾多好評，就去試下。🤤首先必須要提醒大家，雖然餐廳地址寫地庫，但位置並唔係喺雅蘭商場裡面，我同朋友搵左陣先發現餐廳喺雅蘭外面。雖然已過晚飯黃金時間，但仍然要等位。😥好彩等左5分鐘左右已經有枱。坐低唔使諗就決定要試佢個「綠魅拉麵 $62」☘️最中意試唔係豬骨味嘅湯底～而朋友就叫佢特色餐牌上嘅「築地大海老担担麵 $68」🦐另外要左一份炒雜菜一齊食！其實見佢啲串燒都幾吸引，可惜我地兩個唔係好肚餓就打消左呢個念頭。「綠魅拉麵」寫明新鮮菠菜湯底，但奉觀大家唔好諗住係好濃好杰身嘅湯底，只有淡淡嘅菠菜味。🙁反而朋友個虎蝦不錯，亦好欣賞佢個糖心蛋。🥚不過個拉麵餐包埋嘅甜點竟然喺未上主菜已經奉上，加上泡芙唔夠凍，有點減分。😣總括而言，間餐廳其實無咩日本拉麵嘅味道，但勝在平平地選擇多。